Tulisan gisuklan sa 2 babaye 'dagan

Mikaratil og dagan balik sa iyang motorsiklo ang nag-inusarang tulisan nga mingtulis sa lending firm human mailugi og armas sa duha ka empleyadong babaye nga misukol kaniya diha sulod sa lending firm sa dalan S.Osmeña sa Gun-ob, Lapulapu niadtong milabay'ng adlaw.

Apan usa sa mga biktima nga misukol nalandig sa tambalanan human bunali sa punoan sa armas sa suspek nga gibana-banang 5'5 ang gitas-on, itomon, nagsuot og sunglasses ug brown nga polo.

Ang gitulis sa nagbinugtong nga tulisan mao ang Tagom Community Lending Corporation nga nahimutang sa maong dapit nga nakuhaan sa tulisan og P7,300 ug usa ka relo.

Ang duha ka empleyadong babayeng misukol mao sila si Jojie Romo 26, bookkeeper ug Quinie Mae Sungahid 23, Officer in Charge sa maong kumpanya.

Si SPO1 Rodito Viovicente nga nahinabi sa Banat News niingon ang tulisan nagpakaaron-ingnon nga mo-loan ug kuwarta.

Sa dihang giatiman sa duha ka empleyado kalit kining mition ug gikuha ang kuwarta diha sa drawer ni Sungahid ug gipamutol ang linya sa telepono.

Apan si Sungahid nakahigayon og ilog sa armas hangtod nga nahitabo ang linayogay ug nabunalan gyud sa armas ang agtang ug abaga ni Sungahid.

Si Romo nga nakakita nitabang og layog sa tulisan hangtod nga iyang nakuha ang armas nga .38 paltik may sulod upat ka buhing bala.

Daling mikaratil ug dagan ang tulisan paingon sa iyang motorsiklo nga giparking sa unahan nga may plaka GN-6391 ug nipasirit og padagan paingon sa siyudad

Si Sungahid padayon karon giatiman sa mananambal sa Lapulapu District Hospital.