Namaligya x-ray films ipabutyag gyud

Giawhag ni mayor Tomas Osmeña ang hepe sa Cebu City Medical Center (CCMC) Dr. Myrna Go nga motug-an kung kinsa ang mga tawong responsable sa illegal nga pagpamaligya sa mga x-ray films diha sa maong pampublikong tambalanan og dili hulaton nga maapil sa subsub nga imbestigasiyon.

Gipadayag ni Osmeña nga dili gyud siya makatuo nga wala makaila si Go sa mga responsable sa maong binuang og labaw nang dili siya motuo sa mga katarungan nga walay nahitabong susama niini sa CCMC.

Padayong nisalig si Osmeña sa resulta sa imbestigasiyon ni Dr. Nestor Alonzo consultant sa City Hall nga nagbutyag nga konpirmado nga dunay nangahanaw nga x-ray films ug wala usay klarong resibo sa pagpamaligya niini atol sa gipahigayong imbentaryo.

Ang City Attorney's Office maoy gitahasan sa mayor pagpahigayon og imbestigasiyon batok kang Go ug sa tanang mga kawani.

Bug-at nga silot ang nagpaabot alang niadtong mga kawani ug opisyal sa maong pampublikong tambalanan namaligya sa maong x-ray films sa CCMC.

Nasayran nga gitinguha kaniadto ni Osmeña nga pasirad-an ang CCMC tungod kay alang niya nag-usik usik lang kini sa P130 milyones nga gahin matag tuig apan walay maayong serbisyo nga mahatag ngadto sa mga kabus nga pasyente dinhi sa dakbayan og aron ang gahin niini ihapak nalang sa siyudad ngadto sa mga pribadong tambalanan aron makapatambal nga libre ang mga pasyente sa dakbayan apan wala kini mahinayon.