Mga balota wa pa gihapon mabalik

Nagproblema ug nabalaka karon ang provincial comelec office dinhi sa Sugbo nga hangtod karon wa pa mahiuli ang mga ballot boxes nga gipadala didto sa kauluhan niadtong milabay tuig atol sa recounting sa mga balota tali ni Bise presidente Noli de Castro ug Loren Legarda.

Kini maoy gutug-an ni Provincial Comelec Officer Atty. Edwin Cadungog sa dihang nahinabi sa Banat News kagahapon.

Matud pa ni Cadungog nga sila nabalaka tungod kay nagsingabot na ang piniliay karong Mayo ug hangtod karon wala pay abiso gikan sa COMELEC Manila nga kini iuli na.

Gidugang niya nga ang iyang mabuhat lamang mao ang pagpangutana sa Presidential Election Tribunal nga kung pwede naba mabalik ang mga ballot boxes human sa pagpang-ihap niini sa balota didto sa kaulohan.

Tungod niining kadugayon, giingon ni Cadungog nga mapugos gayod ang lalawigan sa Sugbo ug gasto sa pagpalit ug mga ballot boxes kay kini kinahanglanon naman, apan naghinaut siya nga kini di mahitabo.