Cellshop sa 'Lapu gilungkab

Dul-an sa 50 mil ka pesos nga kantidad sa cell phone nakuha sa mga gidudahang sakop sa akyat bahay gang diha sa usa ka cellshop sa dalan Lopez Jaena, Poblacion sa Lapulapu sa milabay'ng adlaw.

Base sa pamahayag ni Zena Sanoria, 31 minyo lumad sa Budyon, Maribago sa maong dakbayan ug tag-iya sa maong cellshop gibanabanang mokantidad og P50 mil ang mga cellphone nga gikawat sa wala pa mailhing tawo.

Matod pa ni SPO2 Rodito Viovicente sa TRS Lapulapu atol sa ilang gihimong imbestigasyon nasuta nga didto miagi sa bangag sa airconditiong unit nga temporaryong gipaayo ug gitak-opan lang sa usa ka plywood.

Gidudahan sa TRS nga suhito sa maong dapit ang kawatan gumikan kay nasayod kini nga gibutangan lamang ug plywood ang maong aircondition unit.