Wala pay kandidatong mi-file og COC sa Mandaue

Ang buhatan sa Commission on Election (Comelec) sa dakbayan sa Mandaue nagpaabot pa gihapon og mga mokandidato sa Mayo 14 nga moduso sa ilang certificate of candidacy.

Si Amie Demana sa Comelec sa maong dakbayan ang mipadayag niini nga gikahinabi sa Banat News kagahapon miingon nga hangtod niining mga panahona wala pay mga pundok sa mga politiko nga miadto sa ilang buhatan alang sa pagduso sa ilang kandidatura sa pagka mayor, bise mayor ug hangtod na sa pagka konsehal.

Sa nasayran nga si Bise Mayor Amadeo Seno ang mipadayag na sa iyang tinguha nga pagkandidato alang sa pagka mayor sa 2007 election.

Si Kanhi Konsehal Magno Dionson ang mipahibalo na usab sa mga tigbalita sa iyang tinguha sa pagkandidato sa mao gihapong posisyon.

Kon kahinumdoman si Jovito Jonkie Ouano ang una nga mipabati sa iyang kandidatura alang sa pagka mayor isip hulip sa iyang amahan nga si Mayor Thadeo Ouano nga motapos na sa ikatulong termino.

Gipahibalo na usab ni Jonkie ang line up sa iyang mga konsehal apan gibakante pa ang iyang tandem alang sa pagka bise mayor.

Si Seno ug Dionson ang gipaabot usab nga mobutang sa ilang kompletong line up alang sa pagka bise mayor ug hangtod sa pagka konsehal.