10 anyos napusilan

Usa ka 10 anyos nga batang babaye ang naangol human napusilan sa miaging hapon sa dalan M.L. Quezon, Maguikay, dakbayan sa Mandaue.

Ang biktima mao si Rosanna Joy Lacendo Ceniza, grade IV pupil sa Maguikay Elementary School ug nagpuyo sa Galaxy Compound sa mao gihapong dapit.

Ang nakapusil mao si John Michael Albaño, 25 anyos, minyo ug silingan sa biktima sa maong dapit.

Si PO3 Gregorio Sabal sa kapolisan sa Presinto 4 sa Casuntingan Police Station nga gikahinabi sa Banat News miingon nga nasuko ang suspetsado nga mobiya na sa ilang panimalay ang iyang katabang nga babaye kay mokuyog kini sa miapas nga lalaki.

Matud pa niya nga gikuha sa suspetsado ang armas nga kalibre 38 ug walay pagpanagana nga gipusil niini ang lalaki nga mokuha sa iyang katabang apan ang biktima nga nahiagi sa maong dapit gikan sa ilang tulunghaan ug mopauli na sa ilang panimalay maoy naigo sa tiyan nga milapos sa luyong bahin sa lawas ang biktima gidala sa tambalanan sa Sugbu.

Si P03 Sabal miingon nga ang suspetsado mitahan sa iyang kaugalingon human sa hitabo ug gitanggong karon sa bilanggoan.