Tag-iya sa Bigfoot adopted son sa Lapu'

Tag-iya sa Bigfoot Group of Companies pormal nga gideklarar nga "Adopted Son" sa dakbayan sa Lapu-lapu atol sa regular session sa konseho sa dakbayan sa Lapulapu kagahapon.

Si Lapulapu City Mayor Arturo Radaza maoy nangunay sa pagdeklarar ni Michael Gleissner ang Chairman sa Bigfoot Group of Companies nga nahimutang sa Buaya sa maong dakbayan.

Resolusyon nga gipangamahanan ni Konsehal Damian Gomez giaprobahan niadtong Disyembre 21, 2006 ug kagahapon pormal usab nga gilagdaan ni Radaza tungod sa nagpakitang tinguha nga mapalambo ang dakbayan sa Lapulapu,usa ka kinaiya nga angayang himoong anak sa dakbayan sa Lapulapu si Gleissner sumala pa sa mayor.

Matud pa ni Radaza nga gumikan sa Bigfoot nahimong sentro sa mga mata sa international arena sa natad sa Entertainment ug sa International Film Academy sa tibook kalibutan ang Lapulapu.

Gumikan niini na-promote ang dakbayan ilabi na ang turismo niini.

Ang Bigfoot mihatag kaniadto og usa ka firetruck ug nakahatag usab og trabaho sa mga Oponanons ug Sugbuanon.

Si Gleissner makatagamtam sa susamang prebelihiyo ug katungod sa usa ka lomulupyo sa maong dakbayan.

Samtang sa habig usab ni Gleissner siya mipadayag nga bisan pa wala kining maong prebelihiyo nga gihatag kaniya isip Adopted Son sa dakbayan sa Lapulapu padayon gihapon siya sa negosyong makatabang paglambo sa Lapulapu ug trabaho sa mga tawo.