Krimen diha sa Mandaue mius-os

Dili badlungon ang mga Field Training Police (FTP) nga gidestino sa Mandaue City Police Office (MCPO) nga mitabang og bantay sa miaging 12th Association of Southeast Asian Nation (Asean) Summit sa Sugbo.

Kini ang gipadayag ni Senior Superintendent Alexander, direktor sa Mandaue City Police Office (MCP0) nga Abadinas nga gikahinabi sa Banat News kagahapon.

Kini misukwahi usab sa nasinati sa mga FTP nga gidestino sa Lapulapu Police Station nga ang mokabat sa 100 kanila ang girekomendar nga tangtangon.

Matud pa ni Abadinas nga dako kaayo og gikatampo ang dugang police visibility sanglit mikubos man usab ang crime rate sa miaging tuig ngadto sa 9 porsiyento.

Gipasabot niya nga ang crime volume sa dakbayan gikan sa 955 sa 2005, mikunhod kini ngadto sa 876 sa tuig 2006.

Si Abadinas miingon dako kaayo og gikatabang alang sa pagpatuman sa kahapsay ug kalinaw sa dakbayan ang mokabat sa 300 ka FTP sa miaging Asean Summit.

Dugang pa niya nga nagmalampuson usab ang ilang mga field supervisor sa padumala sa mga FTP sanglit ang dakbayan nga maoy sentro sa kalihokan sa Asean ang hingpit man usab nga nakatuman sa mga kaakohan niini.

Gitataw ni Abadinas nga ang nakatampo og dako sa crime volume sa miaging tuig mao ang krimen batok sa isig katawo.