Si Inspector Mario Monilar, hepe sa maong buhatan nagkanayon nga bisan wala pa maestablisar kung naghikog o ba kaha aksidente ang pagkapusil sa ulo ni Valenzuela makunsiderar na kining sulbad base usab sa pamahayag sa usa ka testigo ug resulta sa paraffin test.
Matud pang Monilar nga ang service crew sa maong establisamento nga si Christopher Ausa maoy namahayag nga nag-inusara ra gyud nga misulod sa maong kasilyas si Valenzuela diin dangtan og pila ka gutlo usa ka buto sa armas ang iyang nadunggan.
Si Ausa sa unang pakighinabi sa Banat News diha sa crime scene nagkanayon nga naghugas siya og plato niadtong tungura diin ang hugasanan tupad ra gyud sa kasilyas sa mga babaye.
Ang gisumitir nga resulta sa paraffin test gikan ni Chief Inspector Mutchit Salinas sa PNP Crime Laboratory ngadto sa Homicide Section nagpakita nga positibo sa gunpowder nitrate ang duha ka mga kamot ni Valenzuela nga matud pang Monilar posibleng gikan sa pagbuto sa armas niini.
Hinuon wala pa tanan mogawas ang resulta sa ubang mga eksaminasyon sama sa ballistics ug uban pang pagtuon sa patay'ng lawas niini.
"Good as solve, with the fact that she was alone base on the witness who saw her it's either suicide or accidental, plus the result of the paraffin test on the presence of nitrate powder on both hands and her father himself believed that it might be accidental," asoy pang Monilar.