'Argentina crisis' dinhi gikabalak-ang mahitabo

Gibatig kabalaka ang mga tinugyanan sa Pamuo sa dakong kalagmitang mahisama sa Argentina ang nasud sa higayong ikapatuman ang P125 nga umento sa suweldo.

Matud pa ni Dept. of Labor and Employement DoLE-7 Regional Direct or Elias Cayanong, basi sa ilang pagtuon, sama sa gihimo sa National Economic Development Authority NEDA, ang usa ka "disaster" kon katalagman sa ekonomiya malagmit masugatan sa nasud kon mosaler ang mga magbabalaod sa nasud ning maong lakang.

Kini tungod kay nalantawan sa mga batid sa ekonomiya nga mabali ang hitabo, kay samtang nagsige og pangulitawo ang gobiyerno sa mga negosyante sa gawas nga mobubo og puhonan sa negosyo nganhi sa Pilipinas, ang mga na matigayon dinhi sakitan sa kamahal sa "labor cost," malagmit moislag ug manglangyaw ngadto sa ubang nasud sama sa China ug Taiwan.

Gipasabot ni Cayanong nga karon pa lang daan gibati na sa mga negosyante dinhi ang kalupig sa ilang produkto og halin itandi sa mga produkto sa China ug Taiwan nga nagbaha sa merkado gumikan sa kabarato niini.

Kon mosaka na ang suweldo sa mga trabahante mapugos ang mga negosyante sa pag-adjust, diin duha ka butang ang mahitabo, nga kon gusto silang dili mopasaka sa presyo sa ilang produkto, ang ilang trabahante maoy tibhangan.

Apan kon gusto silang dili motibhang og trabahante, pamahalon nila ang presyo sa ilang produkto nga moresulta usab sa di na gyud pagkahalin niini hangtod nga mabangkarota sila og manira sa negosyo.