Ang biktima nga nidangop sa kapolisan human sa hitabo mao si Amparo Rosal Momo 49 ug residente sa Upper Guiwanon sa maong lungsod.
Duha ka wala mailhing lalaki ang gitumbok sa biktima nga pulos may dalang pusil ang nitulis kaniya.
Si Momo miasoy sa kapolisan nga samtang siya naglakaw duol sa little Marikina sa maong dapit kalit lang miabot ang duha sakay sa motorsiklo. Ang backrider maoy nition og pusil kaniya ug dayong diklarar ug tulis.
Gikuha ang iyang bag sa tulisan ug nadala ang kuwarta nga P6,250, usa ka cellphone ug usa ka relo.
Daling miresponde si PO1 Fedilito Jopia uban sa biktima ug ilang nakit-an ang usa ka motorsiklo nga nagparking sa Poblacion ug nailhan ang nagmaneho mao si Jordan Sotto ulitawo ug nagpuyo sa Canamucan Compostela.
Dihang gipangutana si Sotto sa polis kun diin gikan. Kalit lang mipasirit sa motor hinungdan nga nahitabo ang ginukdanay ug ilang nadakpan ug gidala sa presinto.
"Gikan kuno siya nagpalit og barbecue ug balot, sa premiro nihimakak gyud ni siya pero sa kadugayan nitug-an raman ni siya (Sotto) nga nakaila siya sa mitulis ni Amparo pero iapil gihapon kini namo sa pagpasaka og kaso" asoy ni SPO3 Quirino Vasquez sa Banat News kagahapon.
Matud ni Vasquez dili pa nila ibutyag ang pangalan sa duha ka suspek kay nagpadayon pa ang ilang operasyon.