Ang tanod maoy 'uban sa gipatay nga 17 anyos

Gipasakaan na kagahapon diha sa Talisay city prosecutor og kasong pagpanglugos ug pagpatay ang barangay tanod kinsa gipasanginlang milugos ug mipatay sa 17-anyos nga babaye niadtong Sabado sa kaadlawon diha sa Barangay Candulawan, Talisay.

Ang suspetsado mao si Alejandro Pardoncillo, 53, tanod sa Barangay Candulawan temporaryo karong natingkagol diha sa Talisay city police detention cell.

Miluwat kagahapon sa buntag og affidavit diha sa kapolisan sa Talisay ang iyaan sa biktima nga si Theresa Llamedo, 30, ug ang 12 ka batan-on kinsa maoy mitumbok ni Pardoncillo nga maoy kataposang tawo nga kuyog sa biktima.

Ang 12 ka batan-on nagkanayon sa ilang affidavit nga uban ni Pardoncillo nagsakay sila og multicab nga gimaneho ug gipanag-iya ni Necasio Abendan konsehal sa nahisgutang barangay gikan sa Sitio Iba mga alas 2:45 sa kaadlawon niadtong Sabado.

Nakit-an nila si Loren (ngalan gipugngan) nga nagbarog diha daplin sa karsada tungod kay nangita kini sa iyang inahan.

Ang 12 ka batan-on ug si Pardoncillo nanaog duol sa nahimutang ni Loren.

Ang maong mga batan-on mipasangil ni Pardoncillo nga nakainom og ilimnong makahubog og gisita niini si Loren kung nganong naa sa daplin sa karsada.

Gikuyogan ni Pardoncillo si Loren ug wala na pakuyoga ang nahisgutang mga batan-on og mga 3:30 sa kaadlawon sa maong adlaw napalgan na lang si Loren nga patay na og adunay duha ka dinunggaban sa atubangang bahin sa lawas ug usa sa kilid ug nahushos na ang underwear niini.

Si Llamedo sa iyang bahin nagkanayon nga si Pardoncillo ang midumdum kanila sa nahimutangan ni Loren.

Si Pardoncillo sa iyang bahin sa pakighinabi niini sa Banat News kagahapon sa buntag mihimakak sa mga pasangil batok kaniya.

Matud ni Pardoncillo nga pag-umangkon niya ang biktima gisita niya kini kung nganong nagbarog diha daplin sa karsada.

Gitataw ni Pardoncillo nga nangita si Loren sa iyang inahan og gitudlo niini nga misuot iyang inahan dapit sa libon nga lugar nga dunay mga punoan sa Sambag.

Gibiyaan ni Pardoncillo si Loren og misuot kini sa kasambagan apan wala makita sa suspetsado ang inahan sa biktima.

Si Pardoncillo midungag nga pagbalik niya wala na sa lugar si Loren diin niya kini biya-i.