Bastos nga paid-ads sa mantalaan gidili

Giawhag ang Cebu City Anti Indecency Board (CAIB) nga mohimo og lakang batok sa mga bastos og dili maayong talan-awon sa mga advertisement nga gimantala sa lokal nga pamantalaan dinhi sa Sugbo.

Kini maoy sentro sa gituki sa gipahigayong tigum sa CAIB kagahapong adlawa didto sa buhatan ni konsehal Procopio "Coping" Fernandez tsirman sa committee on police fire and penology.

Atol sa maong tigum nga gidumala ni SK Frederation President Glena Bontuyan gikasabutan niini ang pagpadala og suwat ngadto sa tanang mga publishing company dinhi sa Sugbo aron pangayoon ang ilang kooperasyon aron makurihian ang mga laway'ng basahon.

Gitumbok sa maong reklamo nga gipadangat ngadto ni City Attorney Rodulfo Golez ang mga paid adds sa mga lokal nga pamantalaan kabahin sa mga massages services nga dunay portion nga law-ay basahon og may pagka bastos ang termino niini.

Kini sama sa pagmantala sa mga termino nga "extra services" ug ingon man ang pag-hire og mga "sexy" nga massage expert nga makahatag og laing kahulogan ngadto sa mga bumabasa.