Alarcio nahingangha sa Sinulog dinhi sa Sugbu

Beautiful experience! Kini maoy reaksyon ni Police Regional Office 7 director, Chief Supt. Silverio "Boying" Alarcio, Jr. kagahapon sa pagpahigayon sa fluvial parade.

Ang selebrasyon sa Sinulog karon ug ang fluvial parade kagahapon mao pay labing unang higayon nga nasaksihan sa heneral sa tibuok niyang kinabuhi, pag-angkon pa niini sa Banat News.

Si Alarcio uban sa iyang asawang si Sally ug ilang tres anyos nga anak nga si Silverio "Oyong" Alarcio III, luwan sa usa ka lantsa uban ang mga opisyales sa PRO7 nga milawig uban sa kapin 100 ka mga bangka ug lantsa ug mga barko dihang gihatud ang Balaanong Pamilya dinhi sa Sugbu gikan sa Mandaue.

"Beautiful experience, a unique one ngayon lang ako nakaranas ng ganito," asoy pang Alarcio.

Diha sa maong barkong ilang gisakyan dunay giandam nga gamay'ng salo-salo sa mga pamilya sa mga opisyales.

Atol sa maong parada nagpunay ang pabuto, palanog sa mga busina sa mga barko, dunay mipabuto og flares, abyon ug helicopter nga naghulog og mga buwak ug nagdasok ang mga tawo sa daplin sa pantalan samtang nagkaway-kaway kang Sr. Sto. Niño sa MV Trinidad nga maoy gisakyang galleon.

Samtang gipahibalo ni Alarcio nga saksihan usab nila ang Sinulog Grand Mardi Gras karong adlawa uban gihapon sa iyang pamilya aron makumpleto ang ilang selebrasyon.

Matud pa niya nga basin mao kini ang una ug katapusang higayon sa iyang kinabuhi nga makasaksi sa Sinulog sanglit posibleng dili na siya mao ang mahimong direktor sa PRO7 sa sunod tuig.

Ang mardi gras karong adlawa bantayan og 2 mil ka mga polis aron pagsiguro sa seguridad samtang mopakatap usab ang Central Command ug Army Reserve Command og kaugalingong tropa aron pagbantay sa maong selebrasyon.

Si Alarcio nagkanayon nga malinawon ug mabulukon ang kalihukan kagahapon gawas lang sa pagsugod niini diin matud pa sa opisyal nga naglibug sa pagposisyon sa mga barko ug mga bangka.

"Ok naman, although at the start nag-uunahan, kasi iyung problema ng iba hindi alam kung saan sisingit pero after na nagsimulang umusad sa unahan medyo lumuwag-luwag," asoy pa sa heneral.

Atol sa pagsugat kagahapon daghang mga debotos ang nakigduotay aron makakita sa Balaang Pamilya diha pa lang sa Pier Uno diin gisugdan ang mubo nga prosesyon pabalik sa Basilica del Sto.Niño.