Hitman sa Akrho maoy mipusil

Pinangita sa kapolisan sa Sugbu nga sakop sa Alpha Kappa Rho maoy usa sa mga gitumbok nga suspetsado sa pagpatay sa 17 anyos nga tinun-ang babaye nga gilabay sa basurahan sa sitio Progress sa barangay Gun-ob sa dakbayan sa Lapulapu nga napalgan sa miaging buntag.

Ang suspetsado nga gipangita karon sa kapolisan sa Lapulapu mao si Aristotle "Aries" Avez, kinsa migamit na usab og laing alyas nga Dave, gitumbok nga maoy mipusil patay kang Demelsa Casio, 17 anyos, dalaga nga usa ka tinun-an sa kolehiyo ug nagpuyo sa maong dapit.

Si Aves nalakip sa ten most wanted criminal sa Central Visayas ug duna nay patong ang ulo niini bugti sa iyang pagkaaresto. Dinhi sa dakbayan sa Sugbu duna say dili momenus pito ka warrants of arrest.

Si PO3 William Humoc sa homicide section sa kapolisan sa maong dakbayan nga gikahinabi sa Banat News miingon nga mismong ang tulo ka mga kauban ni Aves maoy mitudlo kaniya nga maoy mipusil samtang sila igo lang gipalabay sa lawas sa biktima.

Ang tulo ka dinakpan ug giingong maoy nagyayong paglabay sa biktima sa basurahan mao sila si Ritchelle Cane Albarico, 22, Jake Bisas, Eduard Bisas pulos mga taga Basak, Iba sa maong dakbayan kinsa giingong pulos mga sakop sa Akrho.

Dugang pa ni PO3 Humoc nga gikainom nila ang biktima ug kauban nila si Aves diin usab nahitabo ang panaglalis nga misangko sa pagpamusil.

Si Braulio Paquibot, hingkod ug nagpuyo sa maong dapit maoy nakakaplag sa basurahan nga nahimutang sa kilid sa panimalay ni Rosalie Casio sa maong dapit.