Gwen wala pasakya sa galleon

Si Gobernador Gwendolyn Garcia ug Msgr. Cris Garcia giingong wala tuguti nga mosakay sa galleon kagahapon para makauban sa fluvial parade tungod sa peligro sa siguridad.

Si Msgr. Cris nagkanayon nga 22 ka tuig na siyang nagsige og sakay-sakay sa galleon matag saulog sa kapistahan ni Senior Santo Niño apan niining tuiga lang siya wala tugoti nga mosakay sa galleon nga MV Trinidad.

Lakip usab si Gobernador Garcia wala usab tuguti nga mosakay sa galleon tungod sa siguridad.

Wala mapiho kung aduna bay kalabutan kabahin sa mga taho nga ang mga relihiyosong pundok supak nga dunay pasakyong politiko sa galleon aron magpahumot sa katawhan.

Si Undersecretary Cerge Remonde, ubang kaparian ug ubang mga opisyal gitugotan nga makasakay sa galleon.

Lakip sa mikuyog sa parada diha sa dagat ang kanhi direktor sa Police Regional Office (PRO) 7 nga si Chief Superintendent Rolando Garcia ug Chief Superintendent Silverio Alarcio, direktor karon sa PRO 7, Bise Gobernador Gregorio Sanchez ug kanhi Customs Collector Boy Odilao.

Si Garcia ug Alarcio luwan sa mga sakyanan sa dagat nga mikuyog sa parada, si Sanchez luwan sa usa ka yati ug si Odilao luwan usab sa laing sakyanan sa dagat.

Kagahapon sa buntag gipahigayon ang fluvial parade gikan sa Ouano Wharf sa dakbayan sa Mandaue paingon diha sa pier 1 niining dakbayan.

Ang M/V Trinidad nga maoy gihimong galleon ang gisakyan sa imahen ni Senior Santo Niño ug sa Birhen sa Guadalupe.

Gatusan ka sakyanan sa dagat nga pulos gidayan-dayanan ang mikuyog sa fluvial parade.

Si Mayor Thadeo Ouano, kanhi Mayor Alfredo Ouano, mga sakop sa konseho sa Mandaue ug mga opisyal sa mga barangay sa siyudad mipagikan sa duha ka nahisgutang imahen.

Ang galleon nakagikan mga alas 7:00 sa buntag kagahapon diha sa Ouano Wharf.