Level two 'pusher' nadakpan

Usa ka gidudahang level-two drug pusher ang nadakpan atol sa gihimong buy-bust operation sa mga sakop sa Vice Control Section niadtong milabay'ng Huwebes sa hapon diha sa Salvador Extension sa Labangon.

Ang gidakop giilang si Rey Tatoy Abella alyas Rey Abat, 39, residente sa nahisgutang lugar human giingong mibaligya og usa ka dakong paketeng may sulod nga gidudahang shabu.

Ang grupo sa VCS pinanguluhan ni PO3 Jeffrey Larrobis, inubanan nila ni PO1 Romeo Jumalon, PO1 Roy Cabahug, ug PO1 Julius Aniñon mihimo sa maong operasyon human makadawat og impormasyon kabahin sa iligal nga negosyo sa drogas ni Abella diha sa maong dapit.

Atol sa operasyon giingong gibaligyaan ni Abella si Aniñon ug duha ka police asset og usa ka dakong pakete sa shabu nga gigamitan sa mga polis og pinutol nga mga papel nga gipatungan ug duha ka tag P500.

Si Abella nadakpan na sa Punta Princesa police station niadtong Oktobre 12, 2003 sa buy-bust operation apan gipabuhian siya ni RTC branch 15 judge Fortunato de Gracia niadtong Oktobre 26, 2005 tungod kay kaupat ka higayon wala motungha ang polis nga miaresto kaniya nga si PO1 Antonio Din.