Gilabnihan tungod kay wa mobayad sa 'sex'

Usa ka gipasanginlang isnatser ang milabni sa bag sa usa ka retiradong opisyal sa provincial DepEd human gikatahong ang biktima wala motuman sa sabot nga bayad sa serbisyo niya sa pakig-sex sulod sa sinehan duha na ka adlaw ang milabay.

Ang gipasanginlang isnatser giilang si Jofel Sayson, 27, lumad nga taga Ronda ug nagpuyo karon sa Pusok, Lapulapu kinsa kasamtangan usab nga nagtrabaho isip roomboy sa usa ka inilang hotel sa Lahug.

Ang mireklamong gilabnihan kagahapon giilang si Narciso Ceballos, 69 anyos, residente sa Nivel Rosal, sa Busay kinsa usa ka retiradong opisyal sa DepEd.

Si Ceballos kasamtangang naglakaw diha sulod sa usa ka mall sa Colon dihang kalit nga gilabnihan ni Sayson sa iyang itom nga clutch bag nga may sulod nga P3 mil, lisensya sa armas, mga ID ug uban pang importanteng butang.

Gisuwayan unta og ikyas ni Sayson apan naabtan kini ni Ramil Yamed nga sakop sa Barangay Intelligence Network diha na sa dalan Jakosalem duol sa karaang buhatan sa Veco ug nabawi usab ang butang sa biktima.

Si Sayson sa pakighinabi sa Banat News mipasangil kang Ceballos nga iyang kustomer niadtong Miyerkules diha sulod sa usa ka sinehan sa Colon diin siya gituparan niini ug nakigsabot nga bayran siya og P1,000 bugti sa pakighilawas.

"Kustomer nako na siya sulod sa sinehan adtong Miyerkules, ang sabot namo P1 mil, gihikap-hikap ko niya, gi... unya taud-taud nidiretso man og barog gibiyaan ko niya, lagot ko kay wala ko niya bayri," asoy pang Sayson.

Matud pa ni Sayson kagahapon sa buntag iyang nasigpatan si Ceballos ug nagtuo siyang kini mao ang tawong mi-"thank you" sa iyang serbisyo hinungdan nga iya kining gibawsan agig paglabni.

Si Ceballos sa pakighinabi sa Banat News kusganong mihimakak sa pasangil nga mikuha siya sa serbisyo ni Sayson sanglit wala siya makaila niini.

"No I'm not, I don't know him from Adam and Eve," maisugong tubag ni Ceballos.

Kasong pagpanglabni ang gipasaka ni Ceballos batok kang Sayson kagahapon ngadto sa piskalya.