GRO gikulata sa Korean sud sa inn

Gireklamo sa usa ka 21 anyos nga guest relation officer nga babaye ang usa ka Korean national nga mi-check in uban kaniya sa sulod sa inn sa Subangdaku, Mandaue ug mikulata kaniya.

Si SPO2 Emmanuel Enolpe sa Presinto 2 sa Subangdaku Police Station maoy nakatubag sa maong alarma alas 5 pasado ang takna kagahapon sa buntag.

Ang Korean giila ni SPO2 Enolpe nga mao si Kang Yhonh Goo, 38 anyos, ulitawo nga lumad nga taga South Korea ug nagpuyo sa dalan A.S. Fortuna, Bakilid sa maong dakbayan.

Ang biktima nga gipugngan lang ang pangalan nagtrabaho sa usa ka disco house sa maong dakbayan ug nagkasinabot ug ang Koreano nga mo-chek in sa nahisgotang motel.

Sumala pa ni SPO2 Enolpe nga hubog ang suspetsado ug gipangita niini ang P20, 000 ngadto sa maong babaye ug misangko sa pagpangulata.

Gitambagan ni SPO2 Enolpe ang biktima nga magpakurasyon sa mananambal ug ang suspetsado giditenir usab sa detention cell alang sa tukmang kaso nga ipasaka sa biktima.