Mangunguot modagsang

Gikabalak-an sa mga opisyal sa siyudad sa Sugbu nga modagsa ang daghang mga mangunguot ug mangingilad atol sa pagpahigayon sa tinuig nga selebrasyon sa Sinulog mardi gras karong Domingo atol sa kapistahan ni Señor Sto. Niño.

Si Mayor Tomas Osmeña pormal nga miluwat sa maong pahimangno aron makabantay nang daan ang mga Sugbuanon ilabi na kadtong mga bisita gikan sa lain-laing lugar ug aron dili mo-kompyansa sa pagbutang sa ilang pitaka sa ilang bag ug luyo nga bahin sa bulsa.

Gihimong basehanan ni Osmeña ang nahitabo niya atol gihapon sa selebrasyon sa Sinulog Mardi gras upat ka tuig na ang milabay diin usa siya sa mga nabiktima nga nakuotan sa iyang pitaka diha sa Fuente Osmeña oval.

Tungod niini, miluwat niining maong pahimangno ang mayor aron malikay sa maong kadaot ug kun mahimo dili kaayo magdala og daghang kuwarta sa pagtan-aw sa Sinulog ug siguruong natagoan og maayo ang pitaka niini.

Gipahibalo sa mayor ang mga lugar dinhi sa dakbayan diin anha mag-operate ang mga mangunguot nga sama sa mga crossing nga dalan diin sagad i-atol ang pagpanguot sa pitaka sa dayon nang tabok sa dalan panahon sa stop signal.

Ang laing pahimangno ni Osmeña ngadto sa publiko nga dili sab mokompyansa bisan pa man og nagmalinawon ug walay dautang mga panghitabo sama sa hulgang pagpamomba sa mga terorista atol sa milabay'ng Asean Summit dinhi sa Sugbu tungod kay dili gihapon mawala ang posibilidad nga nagtinguha ang mga dautang pundok paggubot sa maong kalihukan.

Subling giawhag sa mayor ang publiko nga padayong mo-kooperar sa kapolisan ug militar pinaagi sa pag-report kun dunay mga tawong kadudahan og linihukan nga masigpatan diha sa ilang tagsa tagsa ka lugar.

Gawas sa kapolisan dinhi sa dakbayan, mga tanod ug anti crime volunteer, duna say augmentation force nga mga polis gikan sa Region-9 nga motabang og patunhay sa kahusay ug kalinaw atol sa Sinulog Mardi gras karong Domingo.