2 nadakpan sa gun ban diha sa brgy. Mambaling

Duha ka lalaki ang milapas sa Comelec gun ban human makuhai og tagsa ka mga armas ug nakuhaan usab sila og tagsa ka paketeng shabu ug mga gamit pagsuyop niini kagahapon sa buntag diha sa Pungtod, Mambaling ning dakbayan.

Ang mga suspek giilang sila si James Barrera Romarate, 37, ug Jonmarc Rama Petiro, 28, taga Mambaling kinsa parehong wala makapakita og ligal nga dokumentos sa paghupot sa maong mga armas.

Ang grupo ni Senior Inspector Andres Bayarcal sa Mambaling police station maoy miresponde sa tawag sa usa ka residente kabahin sa duha ka mga armadong tawo diha sa maong lugar.

Dihang gisusi, mitakdo ang deskripsyon nga gihatag sa maong residente nila ni Petiro ug Romarate hinungdan nga ila kining gisitar ug girekisa.

Gikatahong nakuhaan ang duha og tagsa ka .38 kalibre rebolber nga pulos may sulod nga lima ka buhing bala, tagsa ka paketeng may sulod nga gituohang shabu ug mga gamit pagsuyop niini.

Ang duha pasakaan og kasong paglapas sa Akta Republika 8294 may kalambigitan sa Omnibus Election Code nga gun ban. Ang gun ban nagsugod niadtong Enero 14 ning tuiga ug gikatakdang matapos karong Hunyo 13.