Mga sundalo hataga'g higayon paglingaw

"Recreation and relaxation" maoy itunol nga pahalipay ngadto sa mga sakop sa militar kinsa nakatampo nga magmalampuson ang Asean summit dinhi sa Cebu.

Gibutyag ni Lt. Col. Jefferson Omandan, tigpamaba sa Central Command sa Armed Forces of the Philippines kinsa nagkanayon nga sugod niadtong Martes nag-anam-anam nag pamauli ngadto sa ilang "mother unit" ang mga sundawo nga taga Mindanao ug uban pang bahin sa nasud.

Miingon si Omandan nga ang sakripisyo sa maong mga sundawo angayang bugtian usab og makalingaw nila kauban ang ilang pamilya tungod kay kadaghanan niini wala makauban sa ilang pamilya sukad pa sa panahon sa pasko, pagsugat sa bag-ong tuig ug mga personal nilang selebrasyon sama sa nag-birthday, anibersaryo sa kasal ug uban pa tungod kay nadestino sila sa Summit.