Usa patay, duha angol human sa bangga

Patay ang usa ka 53 anyos nga babaye ug nangaangol ang bana niini ug tres-anyos nga apo human mibangga sa usa ka truck nga nagparada ang ilang gisakyang Toyota Lite Ace nga nagtangag sa plakang GRK-113 niadtong Martes sa gabii diha sa Sitio Lacaron, Barangay Pitalo lungsod sa San Fernando.

Ang namatay giila sa mga polis nga si Felisa Salvador ug ang nangaangol mao sila si Jose, 59 ug MJ Comedia, mga residente sa Barangay Poblacion lungsod sa Dalaguete.

Si Jose maoy nagmaneho sa nahisgotang Toyota Lite Ace.

Si Police Senior Inspector Antonio Cuyos, hepe sa kapolisan sa San Fernando, nagkanayon nga usa ka Isuzu truck nga nagtangag sa plakang GAZ-561 nga gimaneho ni Constancio Camingaw Bacon, 61, taga Barangay Poblacion lungsod sa Carcar ang nagparada diha kilid sa karsada sa lugar nga nahitaboan tungod kay na-flat ang ligid sa maong sakyanan. Si Bacon mibutang og ligid isip warning device para makita sa ubang mga motorista paglikay sa disgrasya.

Ang Toyota Lite Ace nga gisakyan sa mga biktima naggikan sa dakbayan sa Sugbo.

Milikay si Jose sa nahisgotang warning device apan mibangga hinoon kini sa walang bahin sa sakyanan ni Bacon.

Ang tulo ka biktima daling gidala diha sa South General Hospital sa Tuyan, Naga apan si Felisa patay na kining nadangat sa tambalanan.