Coast Guard nanawat moapil sa fluvial parade

Padayon nga nanawat ang Philippine Coast Guard Cebu og mga partisipante nga interesadong mosalmot sa Fluvial Parade karung Sabado sa kapistahan ni Señor Sto. Niño.

Sa pagkakaron duna nay 35 ka mga partisipante nga nakapalista sa Philippine Coast Guard ug hangtod pa sa Biyernes kutob ang ilang pagpanawat.

Atol sa press briefing kagahapon sa buntag sa Philippine Coast guard pinangulohan ni Commander Manolito Malig-on, station commander sa Coast Guard Station Cebu nasayran nga ilang ipatuman ang higpit nga seguridad samtang anaa sa kagadatan.

Gipahibalo ni Malig-on nga idili usab nila ang pagdala og mga firecracker atol sa Fluvial Parade aron malikayan ang insidente samtang naglawig sa kadagatan.

Gani, ang mga sakop sa Media nga mo-cover sa Fluvial Parade adunay duha ka sakyanan ang gitagana aron mag-usa na lang og cover.

Sa iyang bahin si Supt. Cornelio Salinas sa Regional Maritime Police sa pakighinabi sa mga tigbalita kagahapon nagkanayon nga padayon ang ilang pagmonitor ug pagpahigayon sa pag- inspeksyon sa mga gamit ug bagahe nga dad-on sa mga pasahero nga mosulod ug gawas sa pier area.

Matud niya ang hulga sa mga terorista anaa kanunay busa kanunay silang nag-focus sa intelligence gathering sa komunidad dinhi sa Central Visayas.

Gitug-an ni Salinas nga adunay X-ray machine ang ipamutang sa mga pantalan ug pabantayan usab niya og daghang mga Maritime police ang tibuok area sa pantalan karon nga pipila na lang ka adlaw saulogon na ang Sinulog.

Matud ni Salinas usa sa ilang gibantayan pag-ayo ang mga barko nga naggikan sa Mindanao.

Miapil pa og panawagan si Salinas sa katawhan sa mga nanag-iya og mga armas nga kinahanglan ibilin lang sa ilang panimalay kun wala silay 'exemption' gikan sa Comelec.

Si Insp. Richard Diaz, deputy for administration sa Waterfront Police Station sa pakighinabi sa Banat News kagahapon miingon nga ila usab ipatuman ang crowd control karong Sabado ug Domingo diin ang mga tanod maoy usa sa gitahasan sa pagpatuman sa seguridad.

Gibutyag ni Diaz base sa ilang nadawat nga impormasyon nga may mga grupo sa mga badlongon nga miabot na dinhi sa Sugbo gikan sa Manila, Mindanao ug Ormoc.

"Dili lang ang crowd maoy bantayan sa polis nga naa madestino kun dili ang tanang duol sa iyang palibot, ang security sa summit maoy atong i-apply sa Sinulog unya ato na pud ning gipanid-an na ang giingong nangabot dinhi ang mga badlongon," dugang asoy ni Diaz.