Senior citizens di na kinahanglan ug TIN

Sugod karong Pebrero 2007, dili na magkinahanglan og Tax Identification Numbers ang mga senior citizens aron makapahimulos sa 20 porsyentong diskwento.

Kini ang gipahibawo ni Finance Secretary Margarito Teves human ang Bureau of Internal Revenue ningluwat og revenue regulations nga nagpapas na sa pagkinahanglan sa TIN sa mga senior citizens.

Ang mga senior citizens dunay 20 porsyentong diskwento sa pletehan sa mga pangpublikong sakyanan, botika, tambalanan, kan-anan ug uban pang establisamento base sa gimando sa balaud.

Gawas sa TIN, ang pagpahamtang sa value added tax sa mapalit sa mga senior citizens ibase na sa kantidad nga nakuhaan na sa diskwento.

Gisanglitanan ni Teves nga kun ang presyo P100, P80 na lang ang bayranan sa usa ka senior citizen.

Nunot niini, dili na P12 ang madugang nga VAT sa gipalit sa senior citizen kun dili P9.60 na lang.

Matud pa ni Teves nga ang gikinahanglan na lang sa mga senior citizens mao ang pagpakita og identification card nga makamatuod nga sila niabot na sa 60 anyos aron mahatagan sa diskwento.

Gipasabot ni Teves nga ang mga senior citizens mga retirado na ug wala na magdala sa TIN ang kadaghanan kanila.

Dugang pa ni Teves nga bisan tinguha sa gobyerno nga makatigum og pondo, gikinahanglan usab nga mahatagan ang katawhan sa hustong serbisyo sa panglawas, edukasyon ug inprastraktura aron makadani sa mga negosyante ug dunay daghang trabaho.

Ang BIR niadtong Enero 16, 2006 ningluwat sa RR 1-2007 nga nagpapas sa TIN isip rekisito sa mga senior citizens aron makaangkon og diskwento.