Daghan palista moapil sa Sinulog

Nag-abot-abot na sa pagparehistro sa buhatan sa Sinulog Foundation ang mga out-of-town contingents nga gustong mosalmot sa Sinulog Mardi gras karong Domingo.

Nasayran sa Banat News gikan sa buhatan sa Sinulog Foundation nga karong hapon mao na ang deadline sa lugway nga gihatag sa siyudad ngadto sa mga contingent nga gustong moapil sa Sinulog karong tuiga.

Gikan sa unom lang ka mga contingent alang sa Free Interpretation ug Sinulog Base niadtong niaging semana sugod kagahapon nisaka na kini ngadto sa 14 ka contingent alang sa Free Interpretation ug 15 alang sa Sinulog Base.

Samtang kagahapon sa buntag mitawag usab ngadto kang Sinulog Executive Director Ricky Ballesteros ang mga contingent gikan sa Eastern Samar State University nga mipadayag sa ilang konpirmasyon pagsalmot sa Sinulog.

Masaligon si Ballesteros nga duna pay ubang mga out-of-town contingent ang moapas sa pagparehistro sa dili pa ang deadline karong hapon.

Ang mga nakaparehistro alang sa Free-interpretation naglangkob sa Nagkahiusang Lumolupyo sa Barangay Guadalupe, Tribu Maghahalad sa Talisay City, Pintaflores sa San Carlos Negros Occidental, Southwestern University, Panglao Bohol, Lumad Basakanon (Basak San Nicolas) Tribu Sangguni-ang Kabataan sa Duljo Fatima, Tribu Smart sa Smart Regional Office Mabolo, Landonian Tribe sa Globe Innove, Guinsay National High School sa siyudad sa Danao, Tejero Elementary School ug tribu Mahugyaw sa Florencio Urot National High School.

Samtang sa Sinulog-based naglangkob sa Tawo-Tawo Festival sa Bayawan City Negros Oriental, Coastal Bank, Cebu Market Vendors Development Cooperative, Philippine British Assurance Company, Sinanduloy Cultural Troupe sa Tangub city, Jiboren sa Pasil Proper, Sta. Felomina Elementary School sa Alegria district, Pajo Elementary School sa Lapu-lapu City, Alcoy Siloy Festival sa lungsod sa Alcoy, Lawaan Elementary school sa Talisay City, Lahug Elementary School, Cambangajan Consolacion, Zapatera Elementary School, Tribu Guardo sa Abellana National High School og Mabolo Elementary School.