Ang biktima giila sa Homicide Section nga si Vicitacion Meting, residente sa Mahayahay, Mabolo ning dakbayan apan lumad nga taga Palompon, Leyte. Nakabsan kini sa kinabuhi samtang naglingkod sa lingkuranan gawas sa ABC samtang nanghangyo pa ang iyang anak nga si Ricardo sa doktor aron siya mahatagan og injection nga anti-rabies.
Sumala pa sa iyang anak nga si Ricardo sa pakighinabi sa Banat News niadtong adlaw pang Domingo naglain ang lawas sa iyang inahan ug kanunay na kining magwala.
Niadtong Lunes sa gabii nadesisyunan niyang dad-on kini sa Cebu City Medical Center apan gikatahong bisan gani pagpainom og tubig kaniya iya lang kining isuka hangtud nga gikatahong giingnan siya sa mga doktor nga ibalik na lang sa ila.
Apan kagahapon sa buntag uban sa ilang mga paryenteng si Alma Meting, gitambagan sila sa taga barangay health center nga dad-on kini diha sa Animal Bite Center aron mainiksyunan og anti-rabies.
Samtang nakig-estorya pa si Ricardo kang Dr. Susan Adlawan ang director sa maong buhatan, kabahin sa nahitabo sa inahan, nakabsan gyud kini sa kinabuhi diha na mismo sa sementadong lingkuranan sa atubangan sa ABC.
Base sa gitug-an sa anak niadtong Nobiyembre sa milabay'ng tuig napaakan og iro sa ilang silingan ang inahan ug boluntaryo pang mipasabot ang tag-iya sa iro nga patambalan siya apan gikatahong nagmagahi kini tungod kay garas ra ang pinaakan sa iro.
Dugang pa ng gitug-an ni Alma sa Banat News nga lima na ka tuig ang nakalabay napaakan usab og iro si Vicitacion didto sa Palompon, wala hinuon matino kun niadtong hitaboa nagpa-iniksyon kini kontra rabies.
Si Dr. Adlawan base sa pamahayag sa anak sa namatay nagkanayon nga posibleng ang rabies gyud maoy nakapatay kaniya apan aron pagsiguro buot niyang ipa-awtopsiya ang patay'ng lawas niini tungod kay gikatahong niadtong Sabado pwerteng inom sa biktima uban sa mga silingan ug hubog kini kaayo.
Ang sakit nga rabies usa ka matang sa virus nga diha ra makuha sa laway sa mga hayop sama sa iro, iring ug uban pang mga hayop ug duna say mga okasyon nga sa tawo kini maggikan kung siya nataptan na sa maong sakit.
"It is a highly fatal virus, makamatay gyud na siya kung makaabot ang virus sa utok sa tawo, there is no cure for that disease yet pero ang ato lang ana nga ma-control na siya sa tambal (anti-rabies)," asoy pang Adlawan.
Sumala pa sa doktor nga kasagaran makita ang mga sintomas sa maong sakit 90 ka adlaw gikan nga napaakan ang usa ka tawo hinungdan nga nagduda ang doktor sa hinungdan sa kamatayon ni Meting.
Miangkon si Adlawan nga kanunay gyud kulangon ang suplay sa anti-rabies nga medisina gikan sa Department of Health tungod sa kadaghan sa nagkinahanglan niini adlaw-adlaw.
Sumala pang Adlawan nga gibana-banang moabot 30 ka tawo matag adlaw ang moanha sa iyang klinika aron pagpa-iniksyon sa maong medisina. Tungod sa kamahal usab niini magtampo-tampo na lang ang mga pasyente sa matag vial aron bahinon ang tambal.
Dili usab parehas ang presyo sa maong medisina, dunay nagkantidad og P1,200 ug duna say P1,700 matag vial.