103 ASEAN dancers nahilo sa pagkaon

Nangahilo ang 103 ka mga sakop sa 12th ASEAN Summit Performers sa ilang gikaon nga pagkaon niadtong Sabado sa gabii. Ang mga performers gipakaon og pinutos nang daan nga pagkaon (pack lunch) sa dayon nilang pahuway sa tagsatagsa ka hotels human sa ilang pasundayag sa paglingaw sa delegasyon sa Summit.

Gawas sa gikan sa Sugbo, may mga performers usab nga gikan sa kauluhan nga milingaw sa nagkalainlaing lugar nga gibisitahan sa mga delegado.

Ang mga performers namahuway sa Victor Hotel, Hotel Cesario ug Villa Vista sa dakbayan sa Lapu-lapu sa dihang, matud pa ni Dr. Arnel Rivera, officer-in-charge sa medical team sa Department of Health nga nagbase sa Shangri-La's Mactan Resort and Spa nga takulahaw lang nakasinati ang mga performers og pagsakit sa ilang tiyan, nagkalibang ug nagsuka-suka.

Alas singko sa buntag kagahapon sa buntag, daling gipangdala sa tambalanan ang mga pasyente.

Nalandig sa Perpetual Succor Hospital ang 60, sa Cebu Doctors Hospital ang 23 ug sa Chong Hua Hospital ang 12 nga pulos nahimutang sa dakbayan sa Sugbo.

Ang nabutyag ni Rivera nga sulod sa giputos na nga pagkaon mao lang ang sinugba nga nukos.

Gitouhan nga napan-os na ang pagkaon nga nahatag ngadto sa mga performers.

Samtang gibutyag ni Dr. Susana Madarieta, regional director sa DOH-7 ug in-charge sa operation sa medical teams sa 12th ASEAN Summit nga ilang nasuta nga ang mga pasyente nahiagum sa acute gastroenteritis base sa ilang pakisusi.

Hangtud kagahapon sa hapon, luwas na ang tanang pasyenti sa kuyaw nga kahimtang samtang dunay unom nga gipaubos pa sa rehydration process.

Matud pa ni Madarieta nga ila na nga gipaubos sa imbestigasyon ang maong kaso.

Sa iyang bahin, si Ambassador Marciano Lecaros, tigpamaba sa 12th ASEAN Summit mikompirmar sa taho ug kini napadangat na ngadto kang Presidente Gloria Macapagal Arroyo.

Hinuon masaligon si Lecaros sa katakus sa medical team nga gitahasan sa pagtagad sa susamang insidente.