Bag-ong consular office sa Timor Leste pormal gibuksan kagahapon

Gibuksan kagahapon ang buhatan nga himuong Consulate sa nasud sa East Timor sa ika-unom nga andana sa FGU Tower sa Cebu Business Park, dakbayan sa Sugbo.

Ang maong buhatan dumalahon ni Consul Alexander Fu Kong Sang, ang Special Envoy for Foreign Investment sa East ug Southeast Asian Countries sa Republica Democratica of Timor Leste.

Si Foreign Minister Jose Luis Gutteres ang nangulo sa pagbukas sa maong buhatan.

Matud pa ni Gutteres nga kini ang ikaduha nilang Consular Office sa Pilipinas diin ang usa nahimutang sa Manila.

Gipahibawo ni Gutteres nga sa dili madugay magbutang na gyud sila og Embassy sa Pilipinas.

Mokabat lang sa usa ka gatus ka mga tawo nga taga East Timor ang nia sa Pilipinas kinsa kadaghanan mga nagtungha.

Matud pa ni Gutteres nga mas daghang Pinoy nga toa sa ilang nasud nanarbaho ug nakadayeg siya sa gipakitang lihok sa mga Pinoy sa ilang nasud.

Samtang gipasalamatan ni Guterres ang kagamhanan sa Pilipinas sa pagpadala og mga sakop sa Philippine National Police sa ilang nasud isip kabahin sa United Nations mission.

Matud pa ni Guterres nga dako kaayo ang natabang sa Pilipinas sa pagkab-ot sa kalinaw ug kahusay sa ilang nasud.

Si Director Rodolfo Tor mao karon ang gidestino sa UN isip police commissioner sa bag-ong mission sa East Timor.