Matud pa ni Ricky Ballesteros, ang direktor sa Sinulog Foundation, nga kompirmadong mosayaw gyud ang duruha ubos sa ilang tagsa-tagsa ka contingent diin si Gobernador Gwen Garcia mosayaw ubos sa lalawigan samtang si First lady Margot Osmeña sa dakbayan sa Sugbo.
Kon kahinumduman sa miaging tuig misayaw usab si Gobernador Gwendolyn Garcia sa miaging Sinulog Grand Mardigras isip usa ka star dancer ubos sa contingent sa lalawigan diin nagsul-ob kini siya ug usa ka filipiniana nga sinina, samtang si Margot Osmeña misayaw usab niini.
Midugang si Ballesteros nga mabulokon ang umaabot nga Sinulog Grand Mardigras tungod kay daghan ang misalmot sa maong contest ug gilauman kini nga daghan ang mosaksi niini bisan pa man ug gasigi ug uwan dinhi sa dakbayan sa Sugbo.
Ang Sinulog Grand Mardigras usa ka tinuig nga event dinhi sa dakbayan sa Sugbo diin ang mga katawhan misaulog niini sa kapistahan sa Senyor Santo Niño ug pinaagi sa pagsayaw ang gihimong pag-ampo niini ngadto kaniya.