Bullecer interesado mag-kongresista

Interesado unta nga magpapili pagka-kongresista ubos sa party-list system sa eleksiyon karong bulan sa Mayo ang presidente sa Aids Free Philippines ug chairman sa Cebu City Anti Indecency Board (CAIB) Dr. Rene Josef Bullecer kun nasayo-sayo pa ang pamahayag sa Simbahang Katoliko sa Sugo nga mo-endosar og mga kandidato nga pabotaran ug dili pabotaran sa umaabot nga eleksiyon.

Giangkon ni Dr. Bullecer nga interesado unta siyang molansar ubos sa party-list kun nakaabot pa sa gipahigayong registration sa Comelec ang maong deklarasyon sa Simbahang Katoliko nga mopaluyo og mga kandidato sa eleksiyon.

Alang kang Bullecer wala siyay nakitang dautan sa maong nakab-ot nga lakang sa Simbahang Katoliko gumikan kay gihimo usab kini sa ubang mga relihiyosong sektor sama sa Iglesia ni Kristo ug El Shaddai.

Si Msgr. Achilles Dakay, tigpamaba sa Artsidyosesis sa Sugbo mipadayag nga mo-endosar og mga kandidato ang Simbahang Katoliko karong umaabot eleksiyon ug mahibaw-an sa umaabot nga mga adlaw kadtong mga politiko nga pabotaran sa mga botante karong umaabot nga piniliay.