Rally sa Mandaue nagbinukbokay

Nagubot ang pagpahigayon og lihok protesta sa mga militanteng pundok ug mga sakop sa Crowd Dispersal Management sa kapolisan atol sa unang adlaw pagbukas sa 12th ASEAN Summit kagahapon sa udto sa dalan E.D. Seno sa Guizo, Mandaue.

Ang maong gibanabanang dul-an sa 200 ka raliyista gilangkuban sa Alyansang Makabayan, Partido ng Manggagawa ug Alliance for Democracy, Sanlakas, Freedom from Debt Coalition nga buot mopaduol sa CICC agi sa dalan E.D. Seno agi'g pagsupak sa ASEAN summit dinhi nga ilang gihulagway nga walay maayong maani ang mga taga Sugbo.

Ang grupo gihatagan ni Sr.Supt. Alexander Abadinas, hepe sa Mandaue City Police Office ug Sr.Supt. Mariano Natuel, ang CDM task force commander og 30 minutos aron pagbiya sa dapit apan nagmagahi ang mga militante hinungdan sa pag-abog kanila.

Atol sa inabugay dunay mga militanteng misundot sa mga polis gamit ang mga kahoy nga gipapitlan sa ilang mga bandera ug streamers hinungdan nga mihamag usab ang mga polis ug nagsugod na ang lamok-lamok diin dunay mga nanglupad nga mga bato ug mga kahoy sa streamers.

Usa sa gihimo sa mga militante ang pagbutang ug mipabuto sa sinturon ni Hudas sa estatwang papel ni Presidente Gloria Macapagal Arroyo aron pagpadayag sa gihulagway nilang pag-hudas sa administrasyon sa katawhang Pilipinhon.

Daan na nga mipahibalo si Abadinas nga gidid-an ang mga lihok protesta sa dakbayan subay sa kamandoan ni Mayor Thadeo Ouano nga "no permit, no rally" atol sa summit.

Human sa lamok-lamok, lima ka sakop sa militanteng grupo nga nadakpan ug giilang sila si Edwin Roasa, Allan Pesquera, Farah Domalon, Malou Prada ug Roberto Abellana dayon gipasakay sa nagpaabot nga bus sa kapolisan aron sa pagdetinir kanila.

Si Pesquera sa dihang gihinabi sa mga tigbalita mipasangil nga gikawat sa mga polis ang iyang cellphone atol sa kaguliyang.

Dunay mga nangaangol sa isig ka habig human sa binukbokay apan dangtan og pila ka gutlo, namauli na ang mga militante samtang gidala sa buhatan sa kapolisan ang mga dinakpan.

Kasong traffic obstruction, resisting arrest ug illegal assembly ang kasong giandam sa kapolisan batok sa lima, sumala pang Abadinas.

Samtang dinhi sa dakbayan sa Sugbo, gwardiyado ug malinawon ang gihimong panagtigum sa mga sakop sa Bayan Central Visayas ug Bayan Muna gikan pa sa Bohol, Negros ug ubang parte sa nasud nga misalmot sa ilang lihok protesta.

Daan nang mipasalig sila si Jaime Paglinawan ug Arman Perez sa Bayan ug Bayan Muna nga dili samukon ang kalihukan sa summit apan tugotan gyud silang makapadayag diha sa kadalanan.