Rehistrasyon sa mga kandidato sugdan

Sugod sa Lunes, Enero 15, 2007 andam nang modawat ang Commission on Elections (Comelec) sa magparehistrong kandidato alang sa piniliay sa Mayo.

Mao kini ang pahibawo ni Comelec Chairman Benjamin Abalos kinsa mipahibawo usab nga ipatuman na sugod sa maong adlaw ang pagdili sa mga politiko pagpasiugda'g mga proyekto nga gastohan sa kuwarta sa gobiyerno.

Gidid-an na usab ang mga politiko sa pagpanawat og mga bag-ong aplikante'g trabaho.

Dinhi sa Sugbo gipangandaman na usab sa taga Comelec ang kalagmitang pagdasok sa mga politikong magpalista sa kandidatorang ilang intrahan.

Sa sayo pa, si Atty. Leonil Castillano sa South District sa Cebu city nagkanayon nga andam na ang ilang mga porma alang sa maong okasyon.

Ang balaod nga gipatuman sa Comelec maoy paghatag og higayon sa tanan nga kalikayan ang paglapas sa mga lagda nga nalatid na bahin sa gustong magkandidato.

Hinuon matud pa ni Castillano nga nag-agad ang uban sa ilang mga lider ug maoy hinungdan nga dili gayud masiguro nga diha-diha magparehistro dayon ang kadaghanan.

Ang uban niini susama ra usab sa mga botante nga unya na magpalista sa katapusang gutlo sa dayon nang sira alang sa deadline sa rehistrasyon.

Hinuon alang sa taga Comelec dili na kaayo tantong samok ang rehistrasyon sa mga kandidato kun itandi sa mga botante sanglit diyutay ra ang mga mokandidato kay sa mga botante.