AIDS lakip sa tukion sa summit

Lakip sa tukion niining nagpadayon nga 12th Association of Southeast Asian Nations Summit sa Sugbo ang isyu kabahin sa Acquired Immuno Deficiency Syndrome (AIDS).

Usa ka special session ang ipahigayun karong adlawa aron pagtuki sa isyu sa AIDS sa rehiyon base sa report sa United Nations.

Si UNAIDS Deputy Executive Director Dr. Deborah Landey ang mohatag sa iyang report mahitungod sa Joint United Nations Programme on HIV/AIDS (UNAIDS) isip kabahin sa maong "Special Session on AIDS."

Kini ang unang higayon nga ang ASEAN Summit ningdapit sa usa ka external expert nga makigpulong sa isyu sa AIDS.

Buot masayod ang ASEAN Heads of States sa kahimtang sa AIDS sa tagsatagsa ka nasud ug ang hagit nga ilang atubangon.

Gipaabot nga mosagop og usa ka Declaration on AIDS ang mga ASEAN Heads of States aron mapalig-on ang tagsatagsa ka programa.

Base sa report nga ang Asya ang ikaduha nga dunay labing daghang tawo nga may HIV sa kalibutan ug nagkadaghan kini sa pagkakaron.

"To date, the ASEAN region shows the most severe epidemics within Asia," nagkanayon ang report.