2 ka opisyal sa MNLF gi-hold

Duha ka mga opisyal sa Moro National Liberation Front ang gi-hold sa kapolisan sa dakbayan sa Lapu-Lapu human kini masigpati pagdunggo sa Muelle Osmeña wharf, sa Poblacion dakbayan sa Lapu-Lapu kagahapon sa buntag.

Ang gisukitsukit sa kapolisan mao sila si Joseph Fadriquela, 43, lumad nga taga Saint Bernard, Southern Leyte nagranggo og Kapitan sa MNLF ug Jofil Seroy, 34, taga Saint Bernard, Las Piñas City, usa ka Major sa Special Action Force 508th Infantry/Brigade sa MNLF.

Ang duha gidala sa buhatan sa kapolisan tungod sa giingong kasuspetsahan kaayo nilang lihok ug pagkadiskubre sa duha ka paresan sa camouflage nga uniporme dihang gipangrekisa ang mga bagahe sa duha diha sa Muelle Osmeña wharf.

Ang duha luwan sa usa ka ferry boat gikan sa Pier 3 sa dakbayan sa Sugbo.

Matud pa ni SPO3 Mario Poblete sa Operation Section gawas sa mga uniporme, mipresentar ang duha sa ilang mga ID nga sila sakop sa MNLF. Ang gobiyerno ug MNLF mitapos na sa gubat panahon pa ni kanhi presidente Fidel Ramos, gani pipila kanila gipasulod na sa militar isip mga MNLF integrees.

Matud pa sa duha, relihiyosong kalihukan sa ilang secta nga "Perpektong Gobernong Espiritual" nga nasakop sa Rizalians ang ilang tuyo sa pag-adto sa Pilipog lungsod sa Cordova, sumala pang PO1 Dindo Zerna sa pakighinabi sa Banat News.

Atol sa pagbukas sa 12th ASEAN Summit kagahapong adlawa, si Fadriquela ug Seroy migikan sa Leyte luwan sa M/V FIJI ug miabot dinhi sa Sugbu kagahapon sa alas 3:00 sa kaadlawon ug misakay sa ferry boat alas 7:00 sa buntag padung sa dakbayan sa Lapu-Lapu.

Sumala ni Zerna, dihang ilang gisusi ang simbahan sa Rizalian sa Pilipog gikumpirmar sa mga miyembro nga ilang sakop ang duha ug ila kining mga "katiwala."