Ford nahu'g sa 2nd bridge

Milagro nga nabuhi ang usa ka drayber sa Ford Expidition nga gigamit isip service sa 12th Association of Southeast Asian Nations (Asean) Summit nga kalit lang nahulog sa mokabat 40 kapin ka tiil nga gihabugon sa Marcelo Fernan Bridge paingon sa ubos sa mini park sa Mandaue alas 8 pasado ang takna sa miaging gabii.

Ang drayber giila ni SPO1 Eleazar Saromines, nga mao si Victoriano Laczon, 36, ulitawo nga lumad nga taga dakbayan sa Parañaque nga maoy nagmaneho sa Ford Expidition nga kolor green nga nagdala sa plate number YBD 123.

Dali nga gidala sa Mandaue City Hospital si Laczon nga nakuyapan ug nahibalik ang maayong panimuot sa paglabay sa pipila ka gutlo nga pag-atiman sa mga doktor.

Matud pa ni Saromines nga si Laczon kinsa temporaryong nagpuyo sa Doña Rosario Village sa Basak, Mandaue maoy gi-hire nga drayber sa tag-iya sa Lesser Writer Printing nga nahimutang sa ground floor sa SM City nga gipanag-iya sa magpapatigayon nga si Lina Aquino.

Dugang pa niya, si Laczon miasoy nga nagpaingon kini sa dakbayan sa Lapu-Lapu alang sa panihapon uban sa nagpaabot nga higala nga nagdapit kaniya.

Nagdagan subay sa dalan United Nation Avenue ug kalit lang namatikdan nga dili na niini makontrolar ang dagan hangtod nga nabangga sa railing sa taytayan ug milahos ngadto sa ubos nga bahin sa mini park.

Gipasabot ni Saromines nga dili na kaayo kusog ang impact dihang nahayang ang sakyanan kay nag-una man pagtugpa sa yuta ang lubot nga maoy nakasinati og dakong kadaot.

Si Darius Dal nga maoy nurse on duty sa Mandaue City Hospital nga gikahinabi sa Banat News miingon nga ang biktima kinsa nakasinati lamang og mga kadaut sa kamot ug uban pang bahin sa kalawasan anaa na sa luwas nga kahimtang.