Fratwar sa Tabunok; 1 patay

Giingong mga sakop sa Alpha Kappa Rho (AKRHO) fraternity ang gipamusil sa laing sakop sa fraternity diin usa sa mga biktima ang patay na nga nalandig sa tambalanan ug ang usa naangol niadtong Miyerkules sa gabii diha sa Tabunok, Talisay.

Si PO2 Joel Rosales sa Talisay miila sa mga biktima nga si Edward Gabriel Bacaltos, 17, taga Sitio Mahayahay, San Isidro ug Jared Garban, 20, taga Sitio Mansueto, Bulacao, Talisay.

Si Bacaltos nakaangkon og samad pinusilan sa iyang buko-buko nga gituhoan nga maoy hinungdan sa iyang kamatayon.

Si Garban nakaangkon usab og samad pinusilan sa iyang tuong bukton ug nabali ang kumingking nga tudlo niini sa tuong kamot tungod sa pagkaigo sa bala.

Si Bacaltos ug Garban daling gidala diha sa Talisay District Hospital apan gideklarar si Bacaltos sa doktor nga patay na nga naabot sa tambalanan og si Garban gibalhin sa usa sa mga tambalanan niining dakbayan.

Si Rosales nagkanayon nga ang suspetsado gikatahapang sakop sa Trihedron fraternity kinsa naglakaw og kalit lang niining gipamusil si Bacaltos ug Garban kinsa naglingkod diha atubangan sa usa ka kan-anan sa lugar.

Human sa maong pagpamusil daling miikyas ang suspetsado paingon sa likod sa usa ka dakong tindahan diha sa Tabunok.

Gitataw ni Rosales nga nakompirmar niyang sakop sa Akrho ang mga biktima tungod sa ritual mark o marka sa tuong kamot niini kilid sa pulso og posibleng fraternity war ang hinungdan sa maong hitabo.

Ang kapolisan sa Talisay mi-follow up sa maong insidente.