Fluvial protest giabog sa militar

Wala makapadayon sa fluvial protest ang Kilusang Mangingisda (grupo sa mga mananagat) paingon sa Mactan Channel batok sa ASEAN Summit kagahapon sa buntag human babagi sa Philippine Coastguard, Navy ug Maritime Police.

Siyam ka bangka nga dunay motor nga gisakyan sa grupo sa mga mananagat ang nakabiyahe na unta mga 100 ka metros ang gilay-on gikan sa baybayon sa Sitio Salvador Barangay Tanke dakbayan sa Talisay apan natanggong sa unom ka rubber boats ug speed boats sa Philippine Coastguard, Navy ug Maritime Police nga pulos dunay dalang tag-as nga mga armas.

Gawas sa Philippine Coastguard, Navy ug Maritime Police, adunay mga polis sa Talisay ang gidestino diha sa baybayon sa maong lugar kinsa maoy nagmentinar sa kahapsay ug kalinaw.

Ang grupo sa mananagat mibiya gikan sa baybayon sa Sitio Salvador mga alas 8:00 sa buntag paingon unta sa Mactan Channel apan mibalik kini sa baybayon mga pasado alas 12:00 sa udto tungod kay gituyok-tuyokan sila sa motor boat sa Navy ug Coastguard.

Si Jo Ocampo, media officer sa Kilusang Mangingisda, mibutyag kagahapon sa Banat News nga giduso sa coastguard, Navy ug Maritime Police ang mga pumb boat nga gisakyan sa ilang mga kauban para mobalik kini sa baybayon.

Matud ni Ocampo nga tumong nila ang ilang oposisyon liberalisasyon sa pangisda sa mga miyembro sa ASEAN ug World Trade Organization (WTO).

Gibutyag usab ni Ocampo nga ang kagamhanan wala mohatag og suporta ngadto sa mga mananagat.

Ang mikuyanap karon sa mga merkado mao ang mga imported nga produkto ug alkanse kaayo niini ang mga produkto sa lokal nga mangingisda.