Plantasyon sa marijuana nasikop

Kapolisan sa dakbayan sa Danao nakadiskubre og plantasyon sa marijuana niadtong Martes sa kadlawon diha sa barangay Lawaan sa nahisgotang siyudad.

Ang maong lugar adunay gilay-on nga 25 ka kilometros gikan sa barangay Poblacion.

Mikabat sa 271 ka punoan sa marijuana ang nalarot nila ni SPO3 Alfredo Tapia, SPO1 Luis Perales, SPO1 Alan Muñoz, SPO1 Rodrigo Roble ug Jolito Manco, hepe sa tanod sa nahisgotang barangay.

Si SPO1 Aresteo Espina sa pakighinabi niini sa Banat News kagahapon nagkanayon nga dili unta tuyo sa iyang mga kaubang polis ang pagpang-ibot sa mga punoan sa marijuana.

Matud ni Espina nga dunay gi-serve nga warrant of arrest ang maong mga polis diha sa lugar apan ilang naagian ang lote nga gitamnan og mga marijuana.

Ang kapolisan walay nasikop nga tawo nga posibleng maoy nagtanom sa mga punoan sa marijuana.