Landslide sa bukid miabot og 5

Miabot gyud og lima ka mga landslide ang nahitabo sa mga bukirang barangay dinhi sa dakbayan sa Sugbo niadtong milabay'ng adlaw dihang nasinati ang tibuok adlaw nga pag-ulan-ulan dinhi sa Sugbo niadtong higayona.

Hinuon giklaro ni konsehal Gerardo Carillo, action officer sa Cebu City Disaster Coordinating Council (CCDCC), nga wala hinuoy dagko nga kadaut ingon man mga tawong na-angol sa maong mga ginagmay'ng landslide nga nahitabo dinhi sa dakbayan.

Base sa rekord sa CCDCC ang unang landslide nahitabo sa Tagbao mga alas 10 pasado sa buntag diin midahili ang portion sa yuta sa Sitio Kabaasan duol sa sports complex sa barangay, apan paglabay sa pipila ka oras nalimpyo dayon ang maong lugar ug mahimo nang kaagian sa mga tawo tungod kay daling nagpadala ang City Hall og mga ekipo gikan sa Department of Engineering nga maoy mihawan sa natumpag nga yuta.

Ang ikaduhang landslide nahitabo sa usa ka Sitio sa barangay Gudalupe diin dunay midahili nga yuta sa portion sa agianan paingon sa Sapangdaku.

Ang ikatulong landslide nahitabo sa may mga alas 2 pasado sa hapon didto sa Sitio Sangi, Sinsin diin usa ka panimalay nga gipanag-iya sa pamilyang Fernandez ang natabunan sa midahili nga yuta apan maayo na lang kay nakabantay ang mga nagpuyo niini ug daling nakabiya sa ilang panimalay.

Ang ika-upat nga landslide nahitabo didto sa Buhisan diin si Kapitan Rustica Asid maoy ni-report niini ngaadto sa buhatan sa CCDCC kabahin sa portion sa yuta duol sa ilang panimalay nga kalit lang midahili.

Samtang ang ikalima nga landslide nahitabo sa may mga alas 4 pasado na sa hapon didto duol sa may Villa del Rio, Bacayan apan maayo na lang kay walay mga dagkong kadaot nga nahitabo.

Matud sa konsehal ang maong mga ginagmay'ng landslide resulta kini sa paghumok sa yuta tungod sa tibuok adlaw nga pag-ulan-ulan niadtong Lunes.