China magdala'g kusinero, interpreter

Magdala og kaugalingong kusinero ug interpreter ang delegasyon sa nasud sa China isip dialogue partner sa 12th Association of Southeast Asian Nations Summit sa Sugbo sugod karong adlawa hangtud sa petsa 15.

Ang delegasyon sa mga nasud sa China, New Zealand ug Australia magtapok sa Marco Polo Plaza Cebu.

Apan ang tagdumala sa maong hotel nipahibawo nga ang ilang igsuon, Marco Polo Parkside sa Beijing, China, ang nagpadala gyud sa ilang tulo ka labing maayong kusinero nga mohikay sa pagkaon sa delegasyon sa China.

Kini mao sila si Lu Zhen Ning, Xie Bing Fu ug Huang Yan.

Samtang ang Marco Polo sa Xiamen, China, ang nipadala usab og interpreter nga si Mary Xue.

Gipang-ilisan usab ang mga hotel signs, menus ug collaterals ngadto na sa pinulungang Mandarin.

Kini ilang gituyo aron bati-on sa delegasyon sa China nga daw sama sa naa lang sila sa ilang panimaye sa ilang nasud samtang nia sa Sugbo.

Ang delegasyon sa nasud sa China nga panguluhan ni Premiere Wen Jiabao kauban nilang Minister of Commerce Bo Xilai ug Foreign Minister Li Zhaoxing.

Samtang ang delegasyon sa New Zealand panguluhan ni Prime Minister Helen Clark ug ang Australia panguluhan ni Prime Minister John Howard.

Ang Marco Polo Plaza Cebu nigahin og 194 ka lawak alang sa delegasyon sa nasud sa China, 44 ka lawak sa Australia ug 21 sa New Zealand.