Cuenco mihimakak may 5 ka kapitan mibali na ni Guardo

Gihimakak ni Kongresista Antonio Cuenco sa habagatang distrito sa siyudad sa Sugbo ang pangangkon ni kanhi Cebu City Sports Commissioner Jonathan Guardo nga duna nay ubang mga barangay kapitan sa habagatang distrito ang mibali na ngadto sa oposisyon.

Si Guardo nga mipadayag na og interes nga moatbang kang Cuenco pagka-kongresista karong Mayo una nang nangangkon nga pagkakaron duna nay dili mominos walo ka mga kapitan sa habagatan ang mi-withdraw na sa ilang pagsuporta kang Cuenco ug duna pay laing mobali sa mosunod nga mga adlaw.

Apan gipakagamay kining maong mga tabi-tabi sa kongresista tungod kay kumbinsido gihapon kini nga suportado siya sa mayoriya sa mga kapitan sa iyang distrito.

Gani mitumaw ang mga tabi-tabi nga nagpahigayon karon og loyalty check si Cuenco ngadto sa mga kaalyado niining mga barangay kapitan.

Nunot niini, gihagit ni Cuenco si Guardo sa pagtinuod sa bahad niini nga mosang-at og reklamo sa Ombudsman-Visayas batuk kaniya gumikan sa gireklamo niining paggamit sa pundo sa gobiyerno aron pag-promote sa kandidatura sa kongresista.

Gitumbok ni Guardo ang mga gipatahi sa kongresista nga mga uniporme sa tanod sa mga kabarangayan sa south district nga dunay nakabutang nga name plate nga Cuenco District.

Giawhag sa kongresista si Guardo nga mas maayo nga mohimo lang kini og kaugalingong estratihiya sa pagpangampanya inay nga mamantay sa iyang mga gisagop nga pamaagi.