Mga kapitan: Ayaw'g apil-apil sa mga rally

Giawhag sa 3rd Civil Relation Relation Group sa Central Command ang katawhan nga dili mag apil-apil sa mga kalihukan ug mosalmot sa mga rally nga pagahimuon sa kadalanan sa dakong kalihukan nga Asean Summit karong Enero 12 hangtod sa 15.

Nunot niini, dunay kinse ka mga barangay sa Metro Cebu ang mipadayag ug nanawagan ngadto sa ilang mga konstituwente nga dili magpadala ug makuyog sa mga rally atol sa Asean Summit.

Ang maong kinse ka mga barangay dinhi sa Metro Cebu naila na kaayo nga dunay nagpuyo nga lider ug miyembro sa mga militanteng pundok.

Atol sa press conference kagahapon sa Centcom si Carreta Barangay Kapitan Mariano Ando mibutyag nga ilang gihingusgan ang kampanya sa katawhan nunot sa nagsingabot nga Asean Summit.

Matud ni Ando nga mipahigayon sila og pulong-pulong uban sa mga militar nga nadestino sa iyang lugar sa tinguha nga kumbinsihon ang mga lumolupyo.

Sumala pa ni Ando nga duna siyay nahibaw-an nga gipamayran og tag P300 kada usa nga mga lumolupyo aron lang moapil sa rally atol sa giuswag nga Asean Summit niadtong Disyembre.

Gibutyag ni Ando nga adunay nagpuyo nga walhon sa iyang lugar apan nagpasalamat siya kay wala kini makahatag kanila ug labad sa ulo.

Siya nagpasalamat sa presensya sa mga militar sa iyang barangay kay matud niya nakatabang og dako sa pagpatunhay sa kahapsay ug kalinaw ubos sa pagdumala ni 2nd Lt Ceferino Aranas.

Gani nakahimo sila og kaayuhan ngadto sa katawhan pinaagi sa medical ug dental mission diin gatusan ang nakapahimulos niini ug dihay gipang-apod-apod nga mga tambal.

Gusto ni Ando nga magpabilin ang mga militar bisan pa man kun mahuman na ang Asean Summit.

Samtang si Kapitan Andres Denoy sa Cogon, Cordova nanawagan usab ngadto sa katawhan nga mas labing maayo kun walay moapil sa mga mag rally unya sa Asean Summit.

Si Lt. Col. Oscar Lasangue, group commander sa 3rd Civil Relation Group nga nahinabi sa Banat News nanawagan sa katawhan nga motabang nga dili magubot ang Asean Summit.

Matud niya gigamit lang ang katawhan sa mga walhong kahugpongan sa ilang propaganda pinaagi sa pagpahigayon og rally aron gubton ang maong dakong kalihukan dinhi sa Sugbo.

Gihulagway ni Lasangue nga nagsaba-saba lang sa kadalanan ang mga raleyista, gani nagkaanam na lang sila og kagamay ug dili na tantong daghan.