Kadagatan gibantayan na sad

Ang mga sakop sa Philippine Coast Guard Philippine Maritime Police ug Philippine Navy higpit nga mohimo og pakisusi sa mga barko, pump boat, fishing boat nga mosulod sa kadagatan sa Sugbo.

Kini ilang gitumong alang sa pagpakgang sa pundok sa mga dautang elemento o mga terorista nga mopasiugda og kagubot atol sa 12th Association of Southeast Asian Nations (Asean) Summit nga magsugod karong Miyerkules hangtod sa Lunes sa sunod semana.

Si Chief Lemuel Alquisa sa Philippine Coast Guard sa Sugbo nga gikahinabi sa Banat News kagahapon ang mipadayag niini.

Matud pa niya nga ang paghiusa natigayon pinaagi sa pag-umol sa Task Force Alalay nga ang tahas mao ang pag-monitor sa tanang matang sa sakyanan sa kadagatan nga molabay sa Mactan Channel ug dakbayan sa Lapulapu diin usab mahimutang ang mga hotel nga gipuy-an sa mga langyaw nga delegado.

Gipasabot ni Alquisa nga ang standard procedure nga gipatuman sa naoktabang 12th Asean Summit sa miaging Disyembre 11 hangtod sa 14 sa miaging tuig mao gihapon ang ilang ipatuman nga mga pamaagi sa sunod semana.

Naglakip niini mao ang paghatag og mga pahibalo sa mga tagdumala sa mga shipping company sa mga lagda nga ipatuman sa kadagatan sa panahon sa Asean Summit sa Sugbo.

Ang ilang higpit nga pagdili sa pag-agi duol sa mga hotel nga nahimutang daplin sa kadagatan sa dakbayan sa Lapulapu isip kabahin sa paghatag og kasiguroan sa motambong nga mga delegado.

Giklaro ni Alquisa nga gihatagan og kahigayonan nga makaagi sa mga dapit gidili alang sa pag-agi sa mga sakyanan sa kadagatan mao ang tukmang koordinasyon sa ilang buhatan ug uban pang sakop sa task force alalay nga gipanguluhan sa Naval Forces Command sa Sugbo.