5 ka magsuon "gilugos" sa uyoan

Lima ka mga managsuon ang gipailawon sa eksaminasyon diha sa pink room sa Vicente Sotto Memorial Medical Center human gikatahong gilugos sa ilang uyoan sulod sa iyang panimalay diha sa Carmen Cebu.

Ang suspetsado nga gipasanginlang milugos sa mga biktima mao si Leo Parot, 50 anyos, minyo ug nagpuyo sa maong lungsod kinsa gisikop sa kapolisan kagahapon sa udto didto sa ilang pinuy-anan sa Poblacion Carmen

Matud ni SPO1 Joselito Jopia nga nahinabi sa Banat News ang kamaguwangang biktima nagpangidaron ug 19 anyos, samtang padayon pang gisusi sa kapolisan ang tukmang mga pangidaron sa laing upat ka mga manghod nga biktima nga pulos gitago ang mga pangalan ug apelyedo niini.

Gikatahong ang asawa niini atua sa gawas sa nasud ug bugtong ang suspetsado maoy nahabilin sa iyang panimalay.

Si Jopia sa pakighinabi mitug-an nga ang iyang kaubang polis nga si SPO1 Mario Giangan maoy nakatubag sa tawag sa telepono sa miaging adlaw nga ilang gituohan nga tagtungod sa mga biktima ug nagpahibaw nga dunay gilugos nga lima ka biktima.

Gani unang gipahiling sa Danao District Hospital inabagan sa Department of Social Welfare and Development apan gimanduan nga dad-on nalang kini sa pink room sa DVSMMC.

"Wala siguro ni dungana ug hilabot kay kadaghan unom gud ni kabuok ang mga biktima, siya raman usa pag-adto namo sa ilang balay. Sa among nasayran kining mga bataa anak sa gisuon sa iyang asawa. Amo ra siyang giimbitar nga mokuyog lang namo kay dunay reklamo batok kaniya" dugang asoy sa polis.

Sa pagkakaron ang kapolisan nagpaabot nalang sa resulta sa eksaminasyon sa pink room sa lima ka mga biktima aron ilang magamit pagpasaka ug kaso batok sa suspek ngadto sa piskaliya.