D'Rough moabag sa mga biktima

Mipasalig sa pagtabang ang tag-iya ug tagdumala sa D Rough bus ngadto sa mga namatay ug mga naangol nga pasahero nga sakay niini dihang nahitabo ang aksidente sa miaging Domingo sa Macaas, Catmon, Cebu.

Kini ang nasayran sa Banat News sa follow up nga gihimo kagahapon kang SP01 Acesclo Boto, imbestigador sa traffic section sa kapolisan sa maong lungsod.

Sa nasayran sa Banat News nga tulo namatay nga nahidangat sa Sogod District Hospital ug dugang usa niini namatay sa paghidangat sa tambalanan sa dakbayan sa Sugbo.

Si SP01 Boto miingon nga si Eduard Tiu nga igsuon sa tag-iya sa D'Rough Rider miduaw na kagahapon sa ilang buhatan ug nagpangita na sa mga kabanay sa nakalas nga pasahero ug sa mga naangol nga mga biktima.

Gipadala kini sa tag-iya sa D Rough Rider Bus nga si William Tiu ngadto sa ilang buhatan nga ang tuyo mao ang pagpapangita sa mga kabanay sa mga namatay ug naangol nga mga pasahero aron sa pagpadangat sa ilang hinabang.

Dugang pa ni SP01 Boto nga hangtod niining panahona ilang gipaabot ang mga kabanay sa mga nangamatay ug ang mga naangol sa maong aksidente aron sa pormal nilang pagsang-at sa reklamo batok sa drayber ug tagdumala sa maong bus.

Sumala pa niya nga sa pakisusi nga iyang gihimo, nasuta nga kusog nga nagdagan ang maong sakayanan paingon sa dakbayan sa Sugbo.

Kini ang gipadayag ni Larry Villanes, 52, minyo nga lumad nga taga Tagasa, Bago City sa Negros Occidental nga maoy drayber sa gidumbol nga Fuso cargo truck nga nagkarga og asukar mao usa sa mga nakasaksi sa maong aksidente.

Si Villanes namahayag nga gilikayan sa drayber sa D'Rough Rider Bus ang gikasugat nga laing sakyanan hinungdan sa pagkadumbol ug suwerte nga nakakanaog na siya gikan niini dihang nahitabo ang aksidente.