Lolo gipatay

Patay ang usa ka lolo human kini pusila sa tulo ka wala mailhing tawo samtang mitambong og disko niadtong Sabado sa gabii pasado alas 11:30 sa Sitio Taklob, Napo, Carcar.

Ang gipusil mao si Benjamin Mangurban, 61, minyo usa ka mag-uuma ug residente sa maong lugar kinsa nakaangkon og usa ka samad pinusilan sa walang bahin sa ulo duol sa dunggan ug ubos nga bahin sa tuong ilok.

Tulo ka mga armadong tawo ang gitumbok nga suspek ug maoy mipusil patay ni Mangurban diha sa diskohan.

Sa imbestigasyon ni SPO3 Joel Pananganan sa Carcar nasayran nga ang biktima samtang nagbarog kalit lang giduol sa tulo ka mga tawo ug usa sa tulo ka mga gikatahapan ang mibunot og armas dayong pusil ngadto sa biktima tumong sa ulo.

Human malup-og sa yuta ang biktima ang tulo ka mga gikatahapan daling nanagan palayo sa lugar paingon na ngadto sa ilang pagsibat.

Matud sa kapolisan nga kining biktima dunay daghang gikakontra sa ilang lugar.