Ang nangamatay naglakip sa 10 anyos nga bata nga si Narciso Caycay, taga Tindog, Medellin ug ang magtiayon nga sila si Maria Rosario Maloloy-on ug Virgilo Maloloy-on nga pulos hingkod ang panuigon nga taga Maya, Daanbantayan.
Si SPO3 Romulo Toralba sa Traffic Section sa kapolisan sa nahisgotang lungsod nga gikahinabi sa Banat News miingon nga nagluwan ang mga biktima sa D'Rough Rider Bus nga nagdala sa plate number GVM 118 ug gimaneho ni Ranil Piñas, hingkod ang panuigon kinsa lakip usab sa mga grabeng naangol.
Dugang pa niya nga puno sa pasahero ang bus nga gikan sa amihanang bahin sa lalawigan dihang paghidangat sa maong lugar kalit lang nga nadumbol sa nag-parking nga trak de karga nga nagdala sa plate number nga GLR 692.
Matud pa ni SPO3 Toralba nga tungod sa kusog kaayong impact niini human sa maong pagdumbol, ang maong bus nga pasaheroan nakabaton og grabeng kadaot ug ingon man sa grabeng pagkaangol sa mga pasahero ug mikalas sa tulo ka kinabuhi.
Dugang pa ni SPO3 Toralba nga dali unta nga gidala sa Sogod District Hospital ang mga biktima apan ang mga doktor nga nag-atiman mideklarar sa tulo nga patay na nga nahidangat sa maong tambalanan.
Si SPO3 Toralba miingon nga ang mga naangol nga naglakip sa drayber sa maong bus gidala sa mga tambalanan sa dakbayan sa Sugbo alang sa tukmang pag-atiman.