Gisungag sa taxi patay

Wala nay kinabuhi nga midangat sa Cebu City Medical Center ang usa ka lalaki human kini madasmagi sa usa ka taxi atol sa iyang paglabang diha sa dalan General Maxilom sa barangay Camputhaw ning dakbayan niadtong milabay'ng adlaw.

Ang namatay giilang si Guillermo Caballes, ulitawo ug residente sa dalan V.Rama sa Guadalupe ning dakbayan.

Ang drayber nga nakadasmag kaniya mitahan ra usab sa kapolisan human sa insidente nga giilang si Ronnie Borden, 43, taga Sabang, Danao kinsa maoy nagmaneho sa usa ka Kia Sephie taxi nga may plakang GXB-769.

Matud pa sa imbestigasyon ni PO3 Porferio Lim, Jr. sa Traffic Group sa Cebu City Police Office tungod sa kakusog sa impact nalagpot si Caballes og pila ka metros diha na sa tampi sa kalsada.

Dali untang gidala sa Cebu City Medical Center ang biktima apan gumikan sa grabeng kadaut nga nahiaguman sa ulo ug lawas, patay na kining nadangat didto.

Kasong reckless imprudence resulting to homicide ang gikatakdang isang-at batok sa drayber karong adlawa.