Protesta mosugat sa mga delegado

Ang 12th Association of Southeast Asian Nations (Asean) Summit nga gikatakda karong Enero 10 hangtod sa 15 niining tuiga sugaton og mga protesta sa mga militanteng grupo ug mga drayber sa Sugbo.

Ang Nagkahiusang Drayber sa Sugbo (Nadsu) nga gipangulohan ni Anthony Pogado nalakip sa mohimo'g protesta ug gikatahong suportahan usab sa pipila ka mga kahugpongan sa mga drayber sa kaulohan.

Ang higpit nga pagdili sa City Traffic Office and Management (CITOM) sa pagsulod sa mga PUJ ug ang dili makiangayong pag-impound maoy nalakip sa ilang ipadangat nga reklamo sa ilang pagahimoong protesta.

Maapil usab sa pagpadangat sa reklamo ang mga traysikol drayber sa Paknaan ug Labogon sa dakbayan sa Mandaue sa panakop nga gihimo sa mga enforcer sa Traffic Efficiency Development and Management (TEDMAN) kinsa higpit usab nga nagdili kanila sa pag-agi sa mga dalan nga ubos sa nasudnong kagamhanan.

Si Mandaue City Director Sr. Supt. Alexander Abadinas nga gikahinabi sa Banat News miingon nga ang "no permit no rally policy" nga gimando ni Mayor Thadeo Ouano higpit gayod nilang ipatuman.

Kini gitumong alang sa pagpatuman sa kahapsay ug kalinaw nga dili usab makahatag og kahasol sa katawhan ug mga delegado nga motambong sa kalibutanong panagtigum.

Kahinumdoman nga niadtong miaging semana ang mga sakop sa Paknaan Mandaue Tricycle Operators and Driver Association (Pakmatoda) mihimo unta sa ilang kalit kaayong pag-rally sa atubangan sa city hall.

Si Abadinas mipadala gilayon sa mga sakop sa Crowd Dispersal and Management (CDM) alang sa pagbabag sa mga nagprotestang mga drayber ug hingpit usab niining napugngan.